كورس ميديا باينج مجانًا: أحسن الكورسات المجانية بالعربي
لو لسه بتبدأ في الميديا باينج ومش عايز تدفع قبل ما تتأكد إن المجال ده ليك، فأنت محظوظ: فيه محتوى مجاني كويس جدًا بالعربي، من ناس شغالين في المجال فعلًا، ومن المنصات نفسها. جمعتلك هنا أحسن المصادر اللي أرشّحها، وازاي تستفيد منها.
كورسات مجانية بالعربي
1. كورس أحمد هلال المجاني (9 ساعات)
أحمد هلال نزّل على قناته في يوتيوب كورس كامل حوالي 9 ساعات بعنوان «دليلك الكامل لتعلم التسويق والميديا باينج من الصفر» لسنة 2026. بيبدأ من أساسيات التسويق وبيوصل للإعلانات، وده مناسب جدًا لو بتبدأ من الصفر خالص وعايز كل حاجة في مكان واحد.
2. قناة باسم مجدي
باسم مجدي من أقدم الناس اللي بيشرحوا إعلانات فيسبوك والتسويق الإلكتروني بالعربي على يوتيوب. على قناته قوايم تشغيل كتير، منها «كورس اعلانات الفيسبوك من الصفر للاحتراف»، وفيديوهات عن التطبيق العملي للمبتدئين.
قوايم التشغيل على قناة باسم مجدي
3. خطة الـ 30 يوم (مننا)
لو عايز حد يقولك تتعلم إيه كل يوم وتطبّق ازاي، عملنا خطة الـ 30 يوم مجانية بالمصري، ومعاها شيت متابعة. تقدر تمشي عليها جنب أي كورس من اللي فوق.
كورسات رسمية من المنصات نفسها
- Meta Blueprint: كورسات ميتا الرسمية عن مدير الإعلانات. دقيقة ومحدّثة، وأغلبها بالإنجليزي.
- Google Skillshop: لإعلانات جوجل ويوتيوب، ومعاها شهادات مجانية.
- TikTok Academy: أساسيات إعلانات تيك توك من المنصة نفسها.
- مكتبة إعلانات ميتا: مش كورس، بس أحسن مكان تتعلم منه الكريتيف من إعلانات حقيقية شغالة دلوقتي.
تستفيد من الكورسات المجانية ازاي؟
- اختار مصدر واحد تمشي عليه للآخر بدل ما تنط بين فيديوهات كتير.
- طبّق بعد كل جزء: افتح مدير الإعلانات واعمل اللي اتشرح، حتى لو مش هتنشر.
- اكتب ملاحظاتك بكلامك، خصوصًا المصطلحات والأرقام. لو محتاج تراجعها: CPM وCTR وCPL وROAS.
- اعمل أول حملة صغيرة بفلوسك في الأسبوع التالت أو الرابع. ده اللي هيثبّت كل اللي اتعلمته.
ولو حابب بعد كده تكمّل في برنامج مترتب من الصفر للاحتراف مع جروب للأسئلة: برنامج الميديا باينج فيه 93 فيديو في 13 قسم، والشيتات اللي بنشتغل بيها في الوكالة، وضمان استرجاع 30 يوم. ولو لسه بتختار، شوف 12 سؤال قبل ما تدفع في أي كورس.
أسئلة شائعة
فيه كورس ميديا باينج مجاني كامل بالعربي؟ أيوه، كورس أحمد هلال المجاني حوالي 9 ساعات من الصفر، وقناة باسم مجدي فيها كورس إعلانات فيسبوك من الصفر.
الشهادات المجانية بتفرق في الشغل؟ بتفرق شوية في الأول. اللي بيفرق أكتر إنك توري نتايج حملات عملتها بنفسك.
أبدأ بأنهي كورس؟ لو بتبدأ من الصفر خالص، ابدأ بكورس طويل مترتب، وامشي جنبه على خطة الـ 30 يوم عشان تطبّق.