المدونة
Pixel وConversions API: ليه إعلاناتك مش بتتعلم
كتير من الحملات اللي بيجيلي فيها شكوى «الإعلانات مش بتجيب مبيعات»، المشكلة مش في الإعلان. المشكلة إن فيسبوك أصلًا مش عارف مين اشترى، فمش قادر يتعلم يجيب ناس شبهه.
البيكسل يعني إيه؟
كود صغير بيتحط على موقعك، وبيبلّغ ميتا لما الزائر يعمل حاجة مهمة: يشوف منتج، يضيف للسلة، يبدأ الدفع، يشتري. الأحداث دي هي اللي الخوارزمية بتتعلم منها مين العميل الحقيقي.
طب ليه Conversions API؟
البيكسل شغال من متصفح الزائر. ومانع الإعلانات، وإعدادات الخصوصية في الموبايلات، وبطء الصفحة، بيخلّوا جزء من الأحداث ميوصلش. الـ Conversions API بتبعت نفس الأحداث من السيرفر بتاعك مباشرة لميتا، فاللي البيكسل بيفوّته بيوصل برضه.
الأحسن تشغّل الاتنين مع بعض. ميتا بتشيل التكرار لوحدها لما الحدث يوصل من الاتنين بنفس الرقم المميز (Event ID).
تتأكد ازاي إن كله شغال؟
- افتح Events Manager واختار البيكسل.
- شوف كل حدث جاي منين: المتصفح، ولا السيرفر، ولا الاتنين.
- بص على جودة مطابقة الأحداث (Event Match Quality). كل ما كانت أعلى، كل ما ميتا قدرت تربط الحدث بشخص حقيقي.
- جرّب بنفسك من Test Events: اعمل عملية شراء تجريبية وشوف الحدث وصل ولا لأ.
أشهر الأخطاء
- حدث الشراء بيتبعت مرتين، فالنتايج تبان أحسن من الحقيقة.
- البيكسل على الصفحات بس من غير حدث الشراء.
- حملة مبيعات على بيكسل معندوش أحداث شراء كفاية يتعلم منها.
تجهيز التتبع صح قبل ما تصرف أول جنيه له قسم كامل في برنامج الميديا باينج.